Numeri 26
57 Dizzent wazzen van Levieten aantaikend, rangschikt noar t geslacht: van Gerson t geslacht van Gersonieten, van Kehat t geslacht van Kehatieten, van Merari t geslacht van Merarieten.
58 Dit wazzen geslachten van Levi: t geslacht van Libnieten, t geslacht van Chebronieten, t geslacht van Machlieten, t geslacht van Musieten, t geslacht van Korchieten. Kehats zeun was Amram.
59 Noam van Amram zien vraauw was Jochebed. Zai was n dochter van Levi, dij Levi's vraauw kreeg in Egypte. Jochebed kreeg mit Amram kinder: Aäron, Mozes en dij heur zuster Mirjam.
60 Aäron kreeg kinder: Nadab en Abihu, Eleazar en Itamar.
61 Nadab en Abihu kwammen om dou ze aan de HEER vuur brochten dat nait in odder was.
62 t Aantal Levieten dij opschreven wazzen, ale manvolk van n moand en older, bedruig 23.000. Zai werden noamelk nait teld bie inschrieven omreden ze kregen zulm gain aarfdail onder Isrelieten.
63 Dizzent binnen teld deur Mozes en priester Eleazar, dij Isrelieten aantaikend hebben op Vlakte van Moäb, aan Jordaan bie Jericho.
64 Doar wazzen gainent bie van lu dij in Sinaiwoestijn teld wazzen deur Mozes en Aäron,
65 want de HEER haar zegd dat ze wis in woestijn staarven zollen. Der was gainain van heur overbleven, behaalve Kaleb Jefunneszeun en Jozua Nunszeun.
|
